Afhayeenka Alshabaab oo Faahfaahin ka bixiyay dagaalka Leego
Xarakada Alshabaab ayaa guulo ka sheegatay dagaalo ay la galeen dowlada federaalka Soomaaliyeed iyo ciidamada shisheeye ee garabka siinaya, xilli dowlada federaalka iyo Amisom ay sidoo kale guulo sheegteen.
Afhayeenka dhinaca howl galada xaralada Alshabaab ayaa faah faahin ka bixiyay dagaaladii ugu dambeeyay ee ay la yeesheen ciidamada dowlada iyo kuwa Amisom, isagoo sheegay in dagaaladaasi ay waxyeelo ku gaarsiiyeen dhinacyadaasi.
Afhayeenka Abuu Muscab ayaa sheegay in ciidamada Amisom iyo kuwa dowlada oo isku dayay in ay goobo hor leh isku fidiyaan ay ku dhufteen dharxbaaxo xoog leh, waa sida uu hadalka u dhigaye.
Wuxuu sheegay in ay dileen afar askari oo ka tirsan ciidamada Amisom, gaarina ay ka gudeen, isagoo dhinaca kalena tilmaamay in ay ka hor istaagen dhaqaaqii ay sameyn lahaayeen.
